Kamfanonin rarraba wutar lantarki (DisCos) sun girke sabbin mita 241,590 a fadin Najeriya cikin watanni biyu na farkon shekarar 2026, kamar yadda sabbin bayanai daga Hukumar Kula da Wutar Lantarki ta Kasa (NERC) suka nuna.
Wannan na zuwa ne yayin da masu amfani da wutar lantarki ke ci gaba da kokawa kan tsarin kimanta kudin wuta ba tare da mita ba, tare da kokarin gwamnati na rage gibin masu mita a kasar.
Takardar bayanan NERC ta nuna cewa kwastomomi 119,792 sun samu mita a watan Janairu, yayin da wasu 121,798 suka samu a watan Fabrairu. Hakan ya kara yawan kwastomomin da ke da mita daga 7,086,376 a watan Janairu zuwa 7,208,174 a watan Fabrairu.
Duk da wannan ci gaba, yawan masu mita a fadin kasa ya karu ne kadan daga kashi 57.93 cikin 100 a watan Janairu zuwa kashi 58.57 cikin 100 a watan Fabrairu. Wannan na nufin sama da kwastomomi miliyan biyar har yanzu ba su da mita, kuma suna fuskantar tsarin lissafin kudin wuta na kimantawa.
Kamfanin Eko Electricity Distribution Company ne ya ci gaba da kasancewa kan gaba wajen yawan masu mita da kashi 87.62 cikin 100 a watan Fabrairu, sai Ikeja Electric da ke da kashi 87.16 cikin 100, sannan Abuja DisCo da kashi 79.37 cikin 100. Port Harcourt DisCo ma ya ci gaba da kasancewa sama da matsakaicin kasa, inda ya kai kashi 66.36 cikin 100.
Kamfanin Benin DisCo ne ya fi kowa girke sabbin mita, inda ya girke mita 51,570 a watannin Janairu da Fabrairu gaba daya. Ibadan DisCo, wanda ke da mafi yawan kwastomomi a Najeriya da miliyan 2.48, ya samu adadin masu mita na kashi 52.23 cikin 100, ma’ana kusan rabin kwastomominsa har yanzu ba su da mita.
Kamfanonin rarraba wutar lantarki na Arewa sun ci gaba da zama a baya wajen samar da mita. Jos DisCo ya dan inganta zuwa kashi 34.04 cikin 100, Kaduna zuwa kashi 35.59 cikin 100, Kano kuma zuwa kashi 35.37 cikin 100, yayin da Yola DisCo ya kasance mafi rauni da kashi 31.86 cikin 100.
Masu ruwa da tsaki sun alakanta jinkirin samar da mita da matsalolin rashin isasshen kudade, matsin lambar canjin kudin kasashen waje, matsalolin samar da kayayyaki, da tsadar sayen mita.
Duk da matakan da gwamnati ke dauka, bayanan NERC sun nuna cewa kusan mutum hudu cikin goma daga masu amfani da wutar lantarki a Najeriya har yanzu ba su da mita.
