National Bureau of Statistics (NBS) ta bayyana cewa bangaren sufurin jiragen sama na Najeriya ya samu gagarumin koma-baya a rubu’in farko na shekarar 2026, inda ya ragu da kashi 47.3 cikin dari a kimar kudin shiga (nominal terms), lamarin da ya zama na farko cikin kusan shekaru biyu.
Rahoton ya nuna cewa bangaren, wanda ya samu ci gaba da kashi 57.21 cikin dari a rubu’in farko na 2025, ya fuskanci sauyi mai tsanani, inda wannan koma-baya ya zama mafi muni tun daga raguwar kashi 8.92 cikin dari da aka samu a rubu’in farko na 2024.
A bangaren kudin shiga, sufurin jiragen sama ya samar da Naira biliyan 55.74 a rubu’in farko na 2026, daga Naira biliyan 105.77 a shekarar da ta gabata, abin da ya goge yawancin ci gaban da aka samu a shekarar 2025. Hakan ya sa rabon bangaren a GDP ya fadi zuwa kashi 0.05 cikin dari daga 0.11 cikin dari a 2025.
Haka kuma, hakikanin fitar da kayayyaki (real output) ya ragu da kashi 7.62 cikin dari idan aka kwatanta da shekarar da ta gabata, inda ya kara tabarbarewa daga raguwar kashi 0.81 cikin dari a 2025. A kimar kudin 2019, bangaren ya fadi zuwa Naira biliyan 33.66.
Rahoton ya nuna cewa koma-bayan ya biyo bayan raguwar ci gaba a shekarar 2025, inda ci gaban ya fara da kashi 57.21 cikin dari a Q1, ya sauka zuwa 30.60% a Q2, 2.88% a Q3, sannan 18.02% a Q4 kafin ya koma koma-baya a farkon 2026.
Duk da wannan matsala a bangaren jiragen sama, bangaren sufuri da ajiya gaba daya ya samu ci gaba da kashi 6.51 cikin dari a kimar kudi da kuma 7.41 cikin dari a hakikanin ci gaba a Q1 2026, sakamakon karuwar harkokin sufurin kasa, isar da kaya da kuma sufurin ruwa.
Sai dai masana tattalin arziki sun yi gargadi cewa bangaren jiragen sama na fuskantar babban kalubale. Kungiyar Centre for the Promotion of Private Enterprise (CPPE) ta bayyana cewa haraji, kudade da caji daban-daban na daukar kusan kashi 35 cikin dari na kudin shiga na kamfanonin jiragen sama, lamarin da ke rage ribar aiki da dorewar harkar.
Rahoton ya kuma nuna cewa yawan kudaden tikiti, cajin kaya, kudin hidimar fasinjoji, kudin sauka da tashin jirgi, kudin bincike da kuma haraji kan jirage da kayayyakin gyara na kara matsa wa kamfanoni lamba, lamarin da ke sa kamfanonin cikin gida fuskantar matsin rayuwa wajen ci gaba da aiki.
