Farashin iskar gas na girki (LPG) na ci gaba da tashi a Najeriya, inda a wasu sassan kasar ya kusa kai Naira 2,000 a kowanne kilogram, yayin da jama’a ke shirin bukukuwan Sallah Babba na shekarar 2026.
Gwamnatin Tarayya ta ayyana ranakun 27 da 28 ga Mayu, 2026 a matsayin ranakun hutu domin bukukuwan Eid-el-Kabir, sai dai jama’a da dama sun ce tashin farashin gas din ya rage musu karfin shiri.
Bincike ya nuna cewa farashin ya tashi daga kasa da Naira 1,000 a kowanne kilogram a farkon shekarar nan zuwa tsakanin Naira 1,500 zuwa Naira 1,800 a fadin kasar.
A yankunan kan iyaka na Ogun, masu saye suna biyan kusan Naira 2,000 a kowanne kilogram, yayin da a Lagos, Abeokuta da Ibadan farashin ke tsakanin Naira 1,600 zuwa Naira 1,700. A Arewacin Najeriya kuwa, LPG na sayuwa tsakanin Naira 1,800 zuwa Naira 2,000.
Wani mai saye, Borokinni, ya koka da cewa: “Daya daga cikin hanyoyin da gwamnati za ta taimaka wa talakawa shi ne samar da gas mai sauki, amma shugabannin Najeriya ba sa kula da hakan.”
Wannan karin farashi shi ne na farko a shekarar 2026, kuma na biyu cikin watanni bakwai, bayan rufe wasu sassan harkar mai da gas a watan Oktoba 2025 sakamakon rikici da ya shafi matatar man Dangote da kungiyar ma’aikatan mai da gas ta Petroleum and Natural Gas Senior Staff Association of Nigeria (PENGASSAN).
Kungiyar Nigerian Association of Liquefied Petroleum Gas Marketers (NALPGAM) ta yi gargadin cewa rashin daidaiton wadata da karin farashi na iya kara ta’azzara wahalar rayuwa.
A cikin wata sanarwa da Edu Inyang da Bassey Essien suka rattaba hannu a kai, kungiyar ta ce: “’Yan Najeriya sun tashi suna sayen gas a farashi mai tsada da ya wuce Naira 1,500 a kowanne kilogram, yayin da ‘yan kasuwa ke sayen LPG a tsakanin Naira miliyan 25.2 zuwa 26.2 na kowanne ton 20.”
NALPGAM ta yi gargadin cewa matsalar na barazana ga ci gaban Najeriya wajen amfani da makamashi mai tsafta, inda wasu gidaje ke komawa amfani da itacen girki da gawayi, abin da ke kara hadarin cututtuka, sare itatuwa da lalacewar muhalli.
Kungiyar ta ce rashin daukar mataki cikin gaggawa na iya jawo karin hauhawar farashin abinci, durkushewar kananan ‘yan kasuwar LPG, asarar ayyukan yi, raguwar kwarin gwiwar masu zuba jari da kuma koma baya ga manufofin kare muhalli, inda ta bukaci gwamnati ta gaggauta daukar matakan daidaita wadata da farashi.
