Hukumar Rural Electrification Agency (REA) ta fitar da naira biliyan 3.2 ga kamfanin Zanoplus domin aiwatar da ayyukan samar da wutar lantarki ta hasken rana (solar mini-grid) a fadin Jihar Bauchi, a wani yunkuri na fadada samun wutar lantarki a yankunan da ba su da isasshen wuta.
Kudaden na daga cikin shirin Distributed Access through Renewable Energy Scale-up (DARES), wanda ke karfafa shiga hannun jari na kamfanoni masu zaman kansu ta hanyar cibiyoyin kudi na cikin gida.
Wannan na zuwa ne bayan wata fitowar naira biliyan 7.4 da aka bai wa Ventura Logistics Services domin aikin mini-grid mai karfin megawatt 7, wanda ke nuna ci gaba a kokarin REA na samar da makamashi ta hanyoyi masu zaman kansu.
A karkashin tsarin, wanda ke samun goyon baya daga wata hanyar bashi mai juyawa ta naira biliyan 100 tare da Lotus Bank, masu zuba jari za su iya samun har zuwa naira biliyan 8 don sayen kayan aiki, inda bankin ke bayar da kaso 90 cikin 100 na kudin.
Aikin na Bauchi zai samar da jimillar karfin wuta megawatt 1.2 (MWp), inda za a rarraba shi kamar haka: kilowatt 450 a Gabarin Gabas, kilowatt 400 a Futuk, kilowatt 200 a Gangalawai, da kilowatt 150 a Daburai (Gabarin Yamma).
Manajan Darakta na REA, Abba Aliyu, ya ce nasarar wannan rabon kudi ta ta’allaka ne kan “inganci da gaskiyar tsarin,” yana mai cewa bayyananniyar hanya ta nuna karfin cibiyoyin kudi na cikin gida.
Ya kara da cewa tsarin bayar da kudin bisa nasarar aiki yana tabbatar da cewa ana zuba jari ne kawai a ayyukan da suka cancanta kuma masu bin ka’idojin da aka gindaya, wanda hakan ke aikawa da sako mai karfi ga masu zuba jari na cikin gida da na kasashen waje cewa kasuwar makamashi mai sabuntawa ta Najeriya na da kuzari.
Aliyu ya yabawa cibiyoyin kudi na Najeriya bisa rawar da suke takawa wajen jagorantar ayyukan samar da makamashi mai sabuntawa, yana mai jaddada cewa saukaka hanyoyin samun kudi da hadin gwiwa na da matukar muhimmanci wajen cimma burin samar da wutar lantarki ga kowa a fadin kasar.
