Shigar masu zuba jari na ƙasashen waje a kasuwar hannayen jari ta Nigerian Exchange Limited (NGX) ta yi mummunar fāɗuwa a watan Janairun 2026, inda ta ragu da kashi 75.08 cikin ɗari cikin wata guda kacal.
Bayanai daga rahoton Domestic and Foreign Portfolio Investment sun nuna cewa ma’amalolin ‘yan waje sun sauka daga Naira tiriliyan 0.458 a watan Disamba zuwa Naira tiriliyan 0.114 a Janairu.
Sai dai masana kasuwa ba su fassara wannan a matsayin ficewar jarin waje gaba ɗaya ba. Rahoton ya bayyana cewa raguwar ta samo asali ne daga komawar kasuwa daidai bayan wani watan Disamba mai cike da manyan ma’amaloli na musamman (block trades) da suka ƙara yawan ciniki sosai.
A cewarsa, “raguwar mai tsanani ta faru ne sakamakon rashin irin manyan ma’amalolin da suka ƙara yawan cinikin ‘yan waje a baya.”
Gaba ɗaya kasuwar ma ta shiga wani yanayi na sauƙaƙewa. Jimillar ma’amaloli a kasuwar ta ragu da kashi 37.55 cikin ɗari, daga Naira tiriliyan 1.380 a ƙarshen 2025 zuwa Naira tiriliyan 0.862 a Janairun 2026.
Duk da wannan raguwar ta wata-wata, NGX ta fi yadda take a daidai wannan lokaci na shekarar da ta gabata. Kwatankwacin shekara da shekara ya nuna cewa jimillar ma’amaloli ta ƙaru da kashi 41.99 cikin ɗari idan aka kwatanta da Naira tiriliyan 0.607 da aka samu a Janairun 2025.
Masu zuba jari na cikin gida sun cike giɓin da ‘yan waje suka bari. A halin yanzu, ‘yan cikin gida suna mamaye kasuwar da kashi 86.76 cikin ɗari na dukkan ma’amaloli, inda suka fi ma’amalolin ‘yan waje da kusan kashi 74 cikin ɗari.
A ɓangaren cikin gida, masu zuba jari na ƙanana (retail investors) sun nuna ƙaruwar kwarin gwiwa. Yayin da ma’amalolin manyan cibiyoyi (institutional investors) suka ragu da sama da kashi 35 cikin ɗari, ma’amalolin masu zuba jari na ƙanana sun ƙaru da kashi 12.92 cikin ɗari zuwa Naira tiriliyan 0.359.
Duk da raguwar ma’amalolin cibiyoyi, manyan masu zuba jari sun ci gaba da riƙe rinjaye kaɗan, inda suka mallaki kashi 52 cikin ɗari na kasuwar cikin gida, suna gaban masu zuba jari na ƙanana da tazarar kashi huɗu cikin ɗari.
Idan aka duba dogon lokaci, kasuwar jarin Najeriya na kan tafarkin bunƙasa mai ƙarfi. Tun daga shekarar 2007, ma’amalolin cikin gida sun ƙaru da kashi 160.83 cikin ɗari, yayin da na ‘yan waje suka tashi da kashi 329.87 cikin ɗari cikin shekaru 19 da suka gabata.
