Sashen noma na Najeriya ya kai jimillar juyin kuɗi na Naira tiriliyan 101.46 a shekarar 2025, daga Naira tiriliyan 96.46 da aka samu a shekarar da ta gabata.
Wannan ci gaban, wanda ya samu sakamakon ƙaruwa a zuba jari, ya sa adadin haɓakar sashen a zahiri ya tashi daga kashi 1.69 cikin ɗari zuwa kashi 2.92 cikin ɗari a shekara.
Bayanan da National Bureau of Statistics (NBS) ta fitar sun nuna cewa gudunmawar da sashen noma ya bayar ga Babban Jimillar Kuɗaɗen Shiga na Ƙasa (GDP) ta ƙaru da kashi 5.18 cikin ɗari a farashi na zahiri.
Masu ruwa da tsaki sun danganta wannan bunƙasa da sabuwar sha’awar masu zuba jari da kuma manufofin gwamnati masu tallafa wa kasuwa, ciki har da rangwamen shigo da kayayyaki da aka bayar domin ƙarfafa harkokin kasuwanci.
Fannin noman amfanin gona ne ya fi bada gudunmawa, inda ya samar da Naira tiriliyan 64.41 daga cikin jimillar kuɗin.
Kiwo ya biyo baya da Naira tiriliyan 25.66, yayin da gandun daji da kamun kifi suka samar da Naira tiriliyan 6.47 da Naira tiriliyan 4.92 bi da bi, wanda ya cika tarihin nasarar da aka samu a sashen.
Mista Tunde Banjoko na Ƙungiyar ‘Yan Kasuwa ta Legas ya yabawa ɓangaren masu zaman kansu kan wannan nasara. A cewarsa, “Za mu iya danganta wannan ci gaba da jarin da ɓangaren masu zaman kansu suka zuba a noma a ‘yan lokutan nan, musamman a fannin sarrafawa, gonakin dabino, gonakin koko da kuma sarrafa koko.”
Sai dai nasarar ta zama takobi mai kaifi biyu ga manoman cikin gida. Duk da cewa rangwamen shigo da kayayyaki ya taimaka wajen rage farashin abinci ga masu saye, Banjoko ya yi gargaɗin cewa irin waɗannan manufofi kan haddasa faduwar farashi a kasuwannin cikin gida, lamarin da ke sanyaya gwiwar manoma da dama.
Shi ma Dr. Muda Yusuf, Daraktan CPPE, ya nuna damuwa kan dabarun tsaron abinci na gwamnati. Ya bayyana cewa duk da cewa raguwar hauhawar farashin abinci alheri ne ga jama’a, hakan ya jawo “asarar mai yawa sakamakon faɗuwar farashin manyan amfanin gona” ga masu zuba jari.
Yawaitar shigo da hatsi kamar shinkafa da masara daga ƙasashen waje ta ƙara tsananta wa manoman cikin gida. Yusuf ya jaddada cewa Najeriya ba za ta iya jure tsarin manufofi da zai raunana amincewar masu zuba jari a muhimmin sashen tattalin arziƙinta ba, ta hanyar fifita sauƙin farashi na ɗan gajeren lokaci kan dorewar ci gaba na dogon lokaci.
Domin ci gaba da riƙe wannan nasarar ta Naira tiriliyan 101, masana sun buƙaci a samar da tsarin “Daidaita Farashin Gonaki.” Sun ce dole ne gwamnati ta samo daidaito tsakanin sauƙaƙa farashin abinci ga jama’a da kuma tabbatar da cewa manoman cikin gida sun samu farashi mai adalci da kariya ga amfanin gonarsu.
