Rundunar ’Yan Sanda ta Jihar Rivers ta kama wani matashi mai suna Kingsley Chinamezu, mai shekaru 23, bisa zargin kashe budurwarsa mai suna Confidence Konebari Sunny, mai shekaru 44.
Rahotanni sun bayyana cewa kisan ya faru ne a ranar 30 ga Yuli, 2025, a ƙauyen Umuebulu, cikin karamar hukumar Etche.
Mai magana da yawun rundunar ’yan sandan jihar, SP Grace Iringe-Koko, ta tabbatar da kamun a cikin wata sanarwa, inda ta bayyana cewa an cafke Chinamezu wanda aka fi sani da “Power Sharp” a ranar 15 ga Agusta, a wani boyayyen wuri a ƙauyen Egbeta, Jihar Edo.
Bayanan ’yan sanda sun ce bayan kisan, wanda aka yi da adda, Chinamezu ya tsere zuwa Jihar Edo, inda daga can yake aike da barazanar kashewa ga iyalan mamaci, yana cewa ba za a iya yin masa komai ba.
“Bayan iyalan mamaci sun shigar da ƙara, an miƙa lamarin ga sashen yaki da garkuwa da mutane. Ta hanyar amfani da dabarun bincike na fasaha, jami’an suka gano inda yake suka kuma kama shi. A lokacin tambaya, ya amsa laifin da kansa,” in ji sanarwar.
Rundunar ta ce har yanzu tana tattara ƙarin shaidu da kuma binciken yiwuwar rawar da ya taka a wasu laifuka. Za a gurfanar da shi a kotu bayan an kammala bincike.
Kwamishinan ’yan sandan jihar, CP Olugbenga A. Adepoju, ya yaba da saurin matakin jami’ansa, tare da jaddada cewa ba za a lamunci ayyukan ta’addanci a Jihar Rivers ba.
Ya gargadi masu aikata miyagun laifuka da su daina, yana mai cewa:
“Doka za ta kama duk wanda ya aikata irin wannan mummunan laifi. Adalci dole ne ya yi aiki.”
