Amurka ta kashe dala miliyan 578.78 wajen shigo da ɗanyen man fetur daga Najeriya a kwata na farko na shekarar 2026, ƙasa da dala miliyan 681.40 da aka kashe a irin wannan lokaci na shekarar 2025, kamar yadda bayanan United States Census Bureau da Bureau of Economic Analysis suka nuna.
Bayanan sun nuna cewa shigo da man daga Najeriya ya ragu da kashi 15 cikin 100 idan aka kwatanta da bara, inda adadin gangunan man ya sauka daga miliyan 8.44 a farkon 2025 zuwa miliyan 7.84 a farkon 2026.
Rahoton wata-wata ya nuna raguwar da aka samu tsakanin watan Fabrairu da Maris na 2026, inda adadin man da Amurka ta shigo da shi daga Najeriya ya sauka daga ganguna miliyan 4.64 a Fabrairu zuwa miliyan 1.54 a Maris. Haka kuma kuɗin da aka kashe ya ragu daga dala miliyan 345.33 zuwa dala miliyan 114.49.
Kason Najeriya a jimillar ɗanyen man da Amurka ke shigo da shi daga Afirka ma ya ragu daga kashi 61.7 cikin 100 a farkon 2025 zuwa kashi 34.8 cikin 100 a shekarar 2026, yayin da ƙasashe kamar Libya da Ghana suka ƙara yawan man da suke fitarwa zuwa Amurka.
Duk da raguwar, ɗanyen man Najeriya mai sauƙin tacewa da ƙarancin sulphur na ci gaba da kasancewa mai muhimmanci ga matatun mai na Amurka, duk da sauye-sauyen kasuwar duniya da farashin mai.
Rahoton watan Maris na Nigerian National Petroleum Company Limited (NNPC) ya nuna cewa sayar da ɗanyen man Najeriya ya ragu zuwa ganguna miliyan 17.37, ƙasa da miliyan 22.85 a watan Fabrairu da kuma miliyan 25.75 a watan Janairu, sakamakon matsalolin bututun mai.
NNPC ta bayyana cewa matsalar bututun Trans Forcados Pipeline da ta samo asali daga malalar mai a yankin Keremor ta yi mummunar tasiri ga yawan man da ake hakowa, lamarin da ya haddasa rage yawan samar da mai a wurare da dama.
Kamfanin ya ce yana aiwatar da dabarun dawo da daidaito wajen samar da mai, tare da mayar da hankali kan inganta kayan aiki, magance matsalolin jigilar mai da kuma gyaran wuraren da matsalar ta shafa.
