Mai tsaron ragar Super Eagles, Stanley Nwabali, ya murmure daga rauni kuma yanzu a shirye yake domin taimaka wa Najeriya a fafutukar cancantar Gasar Cin Kofin Duniya ta FIFA 2026.
Dan wasan mai shekaru 29 ya tayar da hankula bayan an kwashe shi daga fili a minti na 35 a wasan Chippa United da Richards Bay. Sai dai ya rage damuwa bayan ya dawo filin wasa a ranar Lahadi, inda ya buga a rashin nasarar Chippa da ci 3-0 a hannun Orlando Pirates a filin wasan Nelson Mandela Bay.
Ko da yake kulob dinsa na ci gaba da zama a ƙasan tebur na South African Premier Division da maki ɗaya kacal daga wasa biyar, kasancewar Nwabali cikin koshin lafiya babban ƙari ne ga Najeriya. Kociyan Super Eagles, Eric Chelle, ya riga ya saka sunansa cikin jerin ƙarshe na ‘yan wasa 23, yana fatan murmurewarsa kafin manyan wasannin biyu masu muhimmanci.
Super Eagles sun kuma sadaukar da nasararsu a wasan da suka yi a Rwanda ga Nwabali, wanda ya rasa wani daga cikin makusantansa kwanan nan.
Najeriya za ta fara yakin neman cancanta da wasa da Rwanda a filin wasa na Godswill Akpabio da ke Uyo, kafin su tafi Bloemfontein domin fafatawa da abokan hamayyar su, South Africa.
Da Super Eagles ke bukatar samun cikakken maki domin ƙarfafa damar su ta zuwa gasar, dawowar Nwabali a tsayin daka a raga ta zo a lokacin da ya dace.
