Babban Bankin Najeriya, wato Central Bank of Nigeria (CBN), ya ci gaba da takaita damar kamfanonin Bureau De Change (BDC) wajen samun kuɗin waje daga kasuwar hukuma, yana mai danganta matakin da matsalolin bin ƙa’ida da kuma abubuwan da suka faru a baya.
A cewar ‘yan kasuwa, bankin ya fi son a rika rarraba kuɗaɗen waje ta hannun bankuna domin samun cikakken sa ido da rage zubewar kuɗi ba bisa ka’ida ba.
Ana ci gaba da nuna damuwa kan batutuwan anfani da bambancin farashi (arbitrage), jujjuya kuɗi (round-tripping), da kuma safarar kuɗaɗe ba bisa ƙa’ida ba (money laundering), wanda ke sa mai tsara dokoki ya ɗauki mataki na taka-tsantsan.
Wani babban jami’i na Association of Bureau De Change Operators of Nigeria (ABCON) ya ce: “Yadda ake kallon rashin ƙarfi wajen bin ƙa’idoji ya sanya wannan fanni ya zama mai haɗari sosai, wanda ya sa CBN ke fifita amfani da hanyoyi kaɗan da kuma tsarin bankuna wajen rarraba kuɗin waje.”
Wani dillali mai lasisi, Umar Barkinzuwo, ya ƙara da cewa: “Mahukunta sun fi son a rika bi ta tsarin bankuna wajen rarraba kuɗin waje, inda ake samun cikakken kulawa daga wuri guda.”
Sai dai, masu gudanar da BDC sun nuna cewa cire su daga tsarin yana rage yawan kuɗin waje a kasuwar ƙananan masu amfani, tare da ƙara matsin lamba a kasuwar bayan fage (parallel market).
Sun dage cewa cikakken ba su dama zai taimaka wajen daidaita farashin canjin kuɗi.
Wannan takunkumi ya biyo bayan shekaru na rashin jituwa. A watan Yulin 2021, CBN ta dakatar da sayar da kuɗin waje ga BDC, tana zarginsu da sauƙaƙa hanyoyin fitar da kuɗi ba bisa ƙa’ida ba.
Ko da yake an ɗan dawo da sayar da kuɗin a watan Fabrairun 2024 bayan soke lasisin sama da 4,000, daga bisani an sake dakatar da tsarin.
A watan Fabrairun 2026 kuma, CBN ta ba da damar shiga kaɗan, inda ta bai wa BDC damar samun dala $150,000 a mako, amma masu sana’ar sun ce damar har yanzu tana da ƙuntatawa.
Sun kuma yi gargadin cewa bankuna da dama ba sa iya biyan buƙatar jama’a, lamarin da ke barin gibin da kasuwar bayan fage ke cikewa.
Duk da gyare-gyare kamar amfani da tsarin zamani da horas da ma’aikata kan bin ƙa’idoji, masana na ganin cewa takunkumin na nuna damuwa mai zurfi kan gaskiya da iko, wanda ke nuna cewa CBN ba ta shirya cikakken haɗa BDC cikin tsarin hukuma na kasuwar canjin kuɗi ba.
