Yawan kamfanonin da ke gudanar da harkokin mai da iskar gas a Najeriya ya karu daga kasa da guda 10 kafin shekarar 2010 zuwa kimanin 117 a yanzu, sakamakon aiwatar da manufofin bunkasa amfani da cikin gida da suka daga matakin aiki daga kasa da kashi 5 cikin 100 a shekarar 2010 zuwa kashi 61 cikin 100 a shekarar 2025.
A taron 2026 Nigerian Oil and Gas Midstream and Downstream Summit da aka gudanar a Lagos, hukumomi da masu ruwa da tsaki a bangaren sun bayyana yadda masana’antar ke fadada, tare da hasashen karin zuba jari a bangarorin tace mai, sarrafa iskar gas, masana’antun sinadarai, gine-ginen kayayyakin more rayuwa da kuma kere-kere a cikin gida.
Mukaddashin Manaja a Hukumar Kula da Bunkasa Abubuwan Cikin Gida ta NCDMB, Patrick June, ya ce kamfanonin da ke aiki a bangaren sun kai kusan 117 tare da samar da ayyukan yi guda 11,934.
Ya kara da cewa bayanan hukumar na nuna akwai kamfanonin hidima 11,764, wuraren hada kayayyaki 50, kamfanonin tsara injiniya guda 20 da kuma kamfanonin kere-kere 122.
Babban Sakataren NCDMB, Felix Ogbe, wanda Austin Azuka ya wakilta, ya bayyana cewa sauye-sauyen manufofi da samar da cikakken tsari sun fara sauya tsarin harkokin mai da iskar gas a Najeriya.
Ya ce babban ci gaban da ake sa ran samu a gaba zai fi karkata ne zuwa bangaren sarrafawa da kasuwancin kayayyakin mai bayan an hako su, maimakon dogaro kacokan da fitar da danyen mai.
Ogbe ya bayyana cewa akwai damammaki masu yawa a bangarorin tattara iskar gas, sarrafawa, matsawa, jigilar kaya, ajiyar gas, bututun mai, iskar girki, compressed natural gas (CNG), tace mai, masana’antun sinadarai, sufuri da kasuwancin dillanci.
Ya kara da cewa Najeriya na sauyawa daga kasar da ke fitar da danyen mai kawai zuwa kasar da ke sarrafawa tare da fitar da kayayyakin da aka gama.
Ogbe ya yaba da matatar Dangote, yana mai bayyana ta a matsayin daya daga cikin manyan matatun mai masu layi guda daya mafi girma a duniya, tare da cewa tana wakiltar burin Najeriya na bunkasa masana’antu.
Shugaban Kwamitin Majalisar Dattawa kan Albarkatun Man Fetur na bangaren Midstream da Downstream, Sanata Kawu Sumaila, ya ce karfafa amfani da abubuwan cikin gida a wadannan bangarori ba kawai wajibi ne na doka ba, har ila yau muhimmin mataki ne na ci gaban kasa.
Ya jaddada cewa dokar Petroleum Industry Act dole ne ta haifar da hakikanin ci gaba da kwarewa, ba wai kasancewar ‘yan Najeriya a takardu kawai ba.
Shi ma Babban Daraktan Hukumar NMDPRA, Rabiu Umar, ya ce bangaren ya samu “gagarumin zuba jari” a shekarun baya-bayan nan, musamman a fannin sarrafa iskar gas da kayayyakin more rayuwa, yana mai cewa hakan na kara nuna muhimmancin Najeriya a bangaren samar da makamashi iri-iri.
