Tsohon ɗan majalisa kuma mai fafutukar siyasa, Dakta Usman Bugaje, ya karyata musun tsohon Shugaban Ƙasa, Olusegun Obasanjo, kan zargin neman wa’adi na uku, yana mai jaddada cewa an yi ƙoƙarin tsawaita mulkinsa ta hanyar barazana da kuma amfani da kuɗi.
Bugaje, wanda ya kasance ɗan majalisa a lokacin, ya bayyana a shirin Morning Show na Arise Television a ranar Litinin cewa ‘yan majalisar dokoki sun fuskanci kai tsaye yunƙurin gyara kundin tsarin mulki na 1999 a shekarar 2006 domin bai wa Obasanjo damar ci gaba da mulki.
“Ina tabbatar muku cewa Obasanjo ya nemi wa’adi na uku. Ya yi duk abin da zai iya yi da ƙarfin ikon da yake da shi don samun wa’adi na uku, amma ya gaza,” in ji Bugaje.
Ya ƙara da cewa ko da Obasanjo bai kira kowa da kansa ba, wakilansa sun “yi barazana ga ‘yan majalisa da dama” tare da bayar da kuɗi don neman goyon baya.
Bugaje ya tuna cewa Sanata Victor Lar, wanda a lokacin shi ne shugaban caucus na Arewa a Majalisar Wakilai, ya sha ɓoye-ɓoye a lokuta daban-daban yayin da ‘yan majalisa ke shirya tsayayya da wannan shiri.
“Mutanen da suka raba kuɗin da suka yi barazana suna nan da rai. Waɗanda suka karɓi kuɗin suna nan da rai. Waɗanda suka ƙi karɓa ma suna nan da rai. Shaidu sun isa… wannan lamari ba zai iya musantawa ba,” in ji shi.
Rigimar neman wa’adi na uku ta mamaye siyasar ƙasar a 2006 lokacin da aka gabatar da shirin gyaran kundin tsarin mulki domin cire iyaka na wa’adin shugabanci biyu. Wannan shiri, wanda aka fi danganta shi da abokan siyasar Obasanjo, ya fadi bayan muhawara mai zafi a majalisa.
Kungiyoyin farar hula, ‘yan adawa, har ma da wasu daga cikin jam’iyyar PDP mai mulki a lokacin, sun ki amincewa da shirin, suna masu cewa zai lalata dimokuraɗiyyar ƙasar. Faduwar shirin ta buɗe kofar gudanar da zaɓen 2007 wanda ya haifar da fitowar marigayi Shugaba Umaru Musa Yar’Adua a matsayin magajin Obasanjo.
Duk da haka, Obasanjo ya ci gaba da musanta neman wa’adi na uku, inda kwanan nan a Ghana ya yi watsi da zargin da cewa ba su da tushe. Amma fitattun ‘yan siyasa da dama sun taba tabbatar da yunƙurin, ciki har da tsohon shugaban majalisar dattawa, Adolphus Wabara, wanda ya ce ya ƙi karɓar cin hancin Naira miliyan 250, da kuma tsohon mataimakin shugaban ƙasa, Atiku Abubakar, wanda ya ce alaƙarsa da ‘yan majalisa ce ta dakile shirin.
