Wata babbar kotu da ke Lokoja ta umurci Sanata mai wakiltar Kogi ta Tsakiya, Natasha Akpoti-Uduaghan, da ta biya tsohon gwamnan jihar Kogi, Yahaya Bello, diyyar naira biliyan 1 bisa zargin bata suna.
A hukuncin da aka yanke ranar Alhamis, 23 ga Afrilu, alkalin kotun, Mai Shari’a A.S. Ibrahim, ya bayyana cewa mai ƙara ya tabbatar da ƙarar sa bisa ga ka’idojin doka.
Shari’ar mai lamba HCL/16/2023 ta ta’allaka ne kan wasu kalamai da Akpoti-Uduaghan ta yi yayin wata hira a shirin The Morning Show na gidan talabijin na Arise TV a ranar 4 ga Nuwamba, 2022.
Alkalin ya yanke hukunci cewa kalaman da ta yi, inda ta bayyana Bello a matsayin “mai kisan kai, mai aikata munanan ayyuka, kuma barazana ga mutanen jihar Kogi,” kalamai ne na bata suna kuma ba su da hujja.
“Wannan hira da wanda ake ƙara ya yi a ranar 4/11/2022 a shirin Arise TV The Morning Show na bata sunan mai ƙara da martabarsa,” in ji alkalin.
“Haka kuma, kalaman da ta yi na kiran mai ƙara mai kisan kai da aikata munanan ayyuka ba su da wani dalili da zai tabbatar da su.”
Kotun ta kuma haramta wa Akpoti-Uduaghan, wakilanta ko abokan hulɗarta yin irin waɗannan kalamai na bata suna kan Bello a kafafen yada labarai kamar rediyo ko talabijin nan gaba.
“An yanke hukuncin biyan naira biliyan 1 a matsayin diyya ga mai ƙara daga wanda ake ƙara,” in ji alkalin.
Bello ne ya shigar da ƙarar, yana mai zargin cewa kalaman sun ɓata masa suna da mutunci.
A lokacin shari’ar, lauyan wanda ake ƙara, Johnson Usman, ya ƙalubalanci ikon kotun na sauraron ƙarar, yana mai cewa akwai cin zarafin tsarin shari’a.
Sai dai lauyan Bello, Friday Ekpa, ya ƙi amincewa da wannan ƙorafi, yana mai cewa wasu shari’o’in da ke gaban babbar kotun FCT ba su shafi Bello a matsayin mutum ba.
Tun da farko, babbar kotun Kogi ta yanke hukuncin cewa tana da hurumin sauraron ƙarar, hukuncin da kotun ɗaukaka ƙara ta tabbatar daga baya bayan ta yi watsi da ƙorafin Akpoti-Uduaghan bisa rashin inganci.
