Tattalin arzikin Najeriya na dab da samun mafi girman bunƙasa cikin sama da shekara goma, a cewar sabon rahoton Global Economic Prospects da Bankin Duniya ya fitar. Rahoton ya yi hasashen cewa tattalin arzikin ƙasar zai bunƙasa da kashi 4.4 cikin 100 a shekarun 2026 da 2027, abin da ke nuna ƙaruwa mai yawa idan aka kwatanta da hasashen da aka yi a baya, tare da ƙara nuna sabon fata ga tattalin arzikin ƙasar da ta fi girma a Afirka.
Bankin Duniya ya danganta wannan kyakkyawan hasashe da haɗin gwiwar wasu muhimman abubuwa, ciki har da ci gaba da farfaɗowar fannin ayyuka (services), ingantuwar samar da amfanin gona, da kuma farfaɗo a hankali amma a kai a kai a sassan da ba na mai ba kamar masana’antu da gine-gine.
Fannonin sadarwa ta zamani (ICT) da ayyukan kuɗi na ci gaba da bunƙasa, sakamakon kirkire-kirkire na fasahar zamani da ƙarin buƙatar masu amfani.
Haka kuma, yanayin damina mai kyau da sauƙaƙa samun kayan aikin noma sun haifar da ƙarin yawan amfanin gona, yayin da zuba jari a ababen more rayuwa da sauye-sauyen manufofi ke tallafa wa bunƙasar masana’antu da gine-gine.
Sabuntawar rahoton na watan Janairu 2026 ta nuna sauyi mai muhimmanci idan aka kwatanta da hasashen Bankin Duniya na watan Yuni 2025.
An ɗaga hasashen bunƙasar tattalin arzikin Najeriya na shekarar 2025 daga kashi 3.6 zuwa 4.2 cikin 100, yayin da hasashen shekarun 2026 da 2027 aka ƙara su zuwa kashi 4.4 cikin 100, abin da ke nuna ƙarin kashi 0.7 da 0.6 cikin 100 bi da bi.
Sai dai duk da wannan kyakkyawan hasashe, Bankin Duniya ya yi gargaɗin cewa Najeriya na fuskantar wasu ƙalubale na tsarin tattalin arziki. Ci gaba da hauhawar farashi, sauyin darajar kuɗi, da ƙarancin kuɗaɗen gwamnati na iya rage saurin bunƙasa idan ba a magance su ta hanyar ɗorewar sauye-sauyen tattalin arziki ba. Duk da haka, rahoton ya jaddada cewa akwai “ci gaba da fata” game da makomar tattalin arzikin Najeriya a matsakaicin lokaci, muddin an tabbatar da kwanciyar hankali a harkokin tattalin arziki tare da ci gaba da aiwatar da sauye-sauye.
