Kiran da World Bank ya yi ga Najeriya da ta sake bude shigo da man fetur ya haifar da sabani tsakanin masu ruwa da tsaki a bangaren man fetur, inda ’yan kasuwa ke goyon bayan cikakken sassaucin kasuwa, yayin da wasu masana ke gargadin kada a raunana tacewar gida.
Ƙungiyar Independent Petroleum Marketers Association of Nigeria (IPMAN) ta ce takaita shigo da man fetur ya sabawa dokar Petroleum Industry Act (PIA), wadda aka kafa domin ƙarfafa gasa a kasuwa.
Mai magana da yawun IPMAN, Chinedu Ukadike, ya ce idan aka sassauta tattalin arziki yadda ya kamata, za a samu gasa mai ƙarfi, yana mai cewa hana shigo da kaya na rage faɗin kasuwa.
Ukadike ya ƙara da cewa dogaro da samar da man fetur daga cikin gida kaɗai ba zai dore ba, yana nuni da yadda Dangote Refinery ta sauya farashi sau da dama cikin watanni huɗu kacal.
Sai dai, wani masanin makamashi, Kelvin Emmanuel, ya yi watsi da shawarar Bankin Duniya, yana mai cewa masu shigo da mai ba za su iya saukar da fetur a farashi mai rahusa ba.
Ya ce, “A zahiri, masu shigo da mai ba za su iya kawo PMS a ƙasa da ₦1,750 kan kowace lita ba… tunanin cewa shigo da mai zai rage farashi kai tsaye ba shi da tushe.”
Emmanuel ya danganta shawarar da damuwar kasuwannin duniya, yana mai cewa sabon ƙarfin tace mai da Najeriya ta samu ya girgiza tsarin kasuwancin mai na duniya.
Shi kuma Farfesa Wumi Iledare ya bayar da matsakaicin ra’ayi, inda ya ce shigo da mai na iya taimakawa na ɗan lokaci wajen daidaita wadatar mai da rage hauhawar farashi, amma ya yi gargaɗin cewa yawan dogaro da hakan na iya rage sha’awar masu zuba jari a harkar tace mai a cikin gida.
“Shigo da mai na iya zama dole a yanzu, amma ya kamata ya kasance na ɗan lokaci kuma a bayyane,” in ji shi.
Haka kuma, Farfesa Dayo Ayoade ya nuna shakku kan manufar Bankin Duniya, yana mai cewa shawarar na iya fi karkata ga muradun ƙasashe masu ci gaba fiye da bukatun Najeriya.
Ya bukaci hukumomi su tabbatar da gaskiya da bayyana gaskiya a tsarin farashi maimakon dogaro da shawarwarin waje.
Wani manazarcin masana’antu, Jeremiah Olatide, ya jaddada bukatar bayyananniyar hanya wajen tsara farashin Dangote Refinery, yana mai cewa har yanzu farashin a gidajen mai yana da tsada duk da raguwar farashin da ake sayarwa daga matatar.
Ya ce, “Bayyana gaskiya da gasa za su taimaka wajen daidaita masana’antar da rage farashi ga masu amfani.”
(An ciro daga jaridar The PUNCH)
