Rundunar ’Yan Sandan Babban Birnin Tarayya (FCT) ta karyata rahotannin da ke yawo a kafafen sada zumunta da ke ikirarin an yi yunkurin kashe Laftanar Ahmed Yerima, tana mai bayyana labarin a matsayin ƙarya sakamakon rashin tushe da kuma iya jefa jama’a cikin firgici ba tare da dalili ba.
A wata sanarwa da jami’ar hulɗa da jama’a ta rundunar, SP Josephine Adeh, ta fitar a ranar Lahadi, ta ce rundunar ba ta samu ko wani rahoto daga kowane sashe na FCT da ke nuna cewa an kai wani hari kan Yerima kamar yadda wasu shafukan sada zumunta suka wallafa ba.
“Rundunar tana son ta bayyana a fili cewa babu wani lamari makamancin haka da aka samu ko aka rubuta a ko’ina cikin FCT,” in ji Adeh, wadda ta bukaci jama’a su yi watsi da wannan “ƙaryar da aka wallafa.” Ta ce yada labarai marasa tushe—kamar wannan ikirarin—na iya tayar da hankula da kuma rudin al’umma.
Ta kuma shawarci mazauna FCT da su kasance masu lura da kewaye tare da kai rahoton duk wani motsi ko abin da aka ga yana iya kawo barazana ga zaman lafiya. Haka kuma ta fitar da lambobin gaggawa domin samun saurin daukar mataki: 08032003913 da 08068587311.
Adeh ta tabbatar da jajircewar rundunar wajen kare rayuka da dukiyoyin jama’a tare da tabbatar da tsaro a duk fadin birnin tarayya.
