Farashin danyen mai a kasuwannin duniya ya tashi zuwa dala $109.3 kan kowace ganga a ranar Lahadi, sakamakon karuwar rikici a yankin Gabas ta Tsakiya, kamar yadda bayanai daga Oilprice.com suka nuna.
Wannan tashin farashi ya biyo bayan gargadin da shugaban kasar Amurka, Donald Trump, ya yi ga Iran, inda ya ce “lokaci na kurewa” bayan tattaunawar kawo karshen yaki ta tsaya cak.
Farashin danyen mai ya tashi daga kusan $107 a makon da ya gabata, inda hakan ke ci gaba da tayar da farashin man fetur a fadin duniya.
Donald Trump ya kuma yi watsi da shawarar Iran na sake bude mashigin ruwan Strait of Hormuz, wanda ke karkashin ikon Tehran tun bayan barkewar yaki a watan Fabrairu, lamarin da ya kawo cikas ga jigilar mai a duniya.
A shafinsa na Truth Social, Trump ya rubuta cewa: “Su hanzarta matuka, in ba haka ba babu abin da zai rage. LOKACI NA DA MUHIMMANCI!” Wannan sanarwa ta fito ne gabanin ganawarsa da Firaministan Isra’ila, Benjamin Netanyahu.
Ma’aikatar harkokin wajen Iran ta bayyana martaninta a matsayin “mai bin doka” da “mai karimci,” tana mai cewa ta kunshi dakatar da yakin nan take, dage takunkumin sojin ruwan Amurka, biyan diyya kan barnar yaki, da kuma amincewa da ikon Iran kan mashigin ruwan.
Donald Trump ya ce shugaban kasar China, Xi Jinping, ya amince cewa Tehran ya kamata ta sake bude mashigin, duk da cewa Beijing ba ta tabbatar da hakan ba.
Ministan harkokin wajen Iran, Seyyed Abbas Araghchi, ya ce mashigin a bude yake ga jiragen kasuwanci matukar sun bi ka’idojin hukumomin Iran.
Rahotanni sun nuna cewa kusan jiragen ruwa 30 na kasar China sun ratsa mashigin a makon da ya gabata, abin da ke nuna muhimmancin yankin ga kasuwancin duniya duk da rikicin da ke ci gaba.
Masana sun yi gargadin cewa ci gaba da rashin zaman lafiya na iya kara tayar da farashin mai, tare da yin illa ga farashin kayayyakin da ake tacewa, sufuri da kuma hauhawar farashi a kasashen da suka dogara da makamashi.
