Ministan Kimiyya da Fasaha, Mista Nnaji, ya karyata zargin da ake yi masa na yin bogin takardun karatu, inda ya bayyana wannan zargi a matsayin karya ce kawai da aka kirkira don dalilai na siyasa.
A yayin taron manema labarai da aka gudanar a Abuja ranar Litinin, kakakin ministan, Dokta Robert Ngwu, ya ce labarin bogin takardun karatun ministan ba gaskiya ba ne, kuma wata dabara ce da ake amfani da ita domin bata masa suna da kuma dakile ci gaban siyasar sa.
Dokta Robert ya bayyana cewa Mista Nnaji tsohon ɗalibi ne na Jami’ar Najeriya da ke Nsukka, inda aka karɓe shi kuma ya kammala karatu a shekarar 1985. Ya kara da cewa bayanan karatunsa suna nan a rubuce, kuma jami’ar da Hukumar Tsaron Cikin Gida (DSS) sun taba tabbatar da sahihancinsu a baya.
“Wannan abin siyasa ne kawai don bata suna. Sunan Minista da hotonsa suna cikin jerin sunayen ɗaliban da suka kammala a sashen jami’ar a shekarar 1985. Babu wani sabani a cikin bayanan,” in ji Dokta Robert.
A cewarsa, wannan sabon rikici ya samo asali ne daga wata makarkashiya da aka shirya domin rage tasirin Ministan a fagen siyasa, musamman a cikin jam’iyyar All Progressives Congress (APC). Ya kuma zargi Mataimakin Shugaban Jami’ar Najeriya da kasancewa memba na jam’iyyar adawa ta Peoples Democratic Party (PDP), wanda ya ki bin umarnin kotu da ta bayar kan a saki takardun karatun Ministan.
“Ministan ya nemi kariya ta doka kuma kotu ta bayar da umarni da jami’ar ta saki takardun karatunsa. Amma har yanzu jami’ar ta ki bin wannan umarni,” in ji shi.
Dokta Robert ya kuma zargi wani gwamna da ke kan mulki da daukar nauyin wannan yunkuri, inda ya ce gwamnan yana shirin komawa jam’iyyar APC. A cewarsa, shaharar Ministan da goyon bayansa ga jam’iyyar APC na barazana ga burin siyasar gwamnan.
“Ministan yana daga cikin manyan jiga-jigan da suka taimaka wajen nasarar APC a yankin. Burinsu shi ne su fitar da shi daga hanya kafin zaben gwamnoni na 2027. Amma mutane sun riga sun fahimci gaskiya,” Dokta Robert ya kara da cewa.
Game da batun bambancin suna a takardun makaranta, kakakin ya ce sunayen duka biyu na nufin mutum daya, kuma an taba tantance wannan batu a baya lokacin tabbatar da takardu.
“Ba batun takardun karatu ne ba, batun karfin siyasa ne. Sun san ba za su iya kayar da shi a siyasa ba, shi ya sa suke kokarin bata masa suna ta hanyar karya,” in ji shi.
A halin da ake ciki, magoya bayan Ministan sun bukaci jami’ar da ta bi umarnin kotu ta saki takardun karatunsa, tare da kira ga jama’a da su maida hankali kan gaskiya maimakon yada farfaganda ta siyasa.
