Gwamnatin Tarayya ta amince da gina wani sabon tsarin jirgin ƙasa na birnin Kano (Metropolitan Rail Service) da kuɗinsa ya kai naira tiriliyan ɗaya (₦1trn).
Gwamnan Jihar Kano, Abba Kabir Yusuf, ne ya sanar da hakan yayin da yake jawabi ga mambobin tawagar jihar da suka halarci Gasar Karatun Alƙur’ani ta Ƙasa ta shekarar 2025 da aka gudanar a Jihar Borno.
A cewar gwamnan, an tsara aikin jirgin ƙasan ne domin sauya fasalin sufuri a cikin birnin Kano ta hanyar samar da ingantaccen, zamani kuma mai araha na jigilar jama’a, wanda zai haɗa muhimman yankuna da unguwanni a faɗin birnin.
Ya ce aikin zai taimaka matuƙa wajen rage cunkoson ababen hawa, inganta zirga-zirga ga mazauna jihar, sauƙaƙa harkokin kasuwanci tare da jawo sabbin masu zuba jari zuwa Kano.
Gwamna Yusuf ya bayyana aikin a matsayin muhimmin tallafi daga Gwamnatin Tarayya, wanda zai sake ɗora Kano a kan taswirar manyan cibiyoyin sufuri da kasuwanci a Arewacin Najeriya.
Har ila yau, ya danganta amincewar da aka ba aikin da sabuwar daidaitawar siyasa da gwamnatinsa ta yi da Gwamnatin Tarayya ƙarƙashin jam’iyyar APC, yana mai cewa matakin ya kasance na dabara ne domin jawo manyan ayyukan ci gaba zuwa jihar.
“Mun yanke wannan shawara ne domin gaggauta ci gaba da kuma tabbatar da manyan ayyuka da za su yi tasiri kai tsaye ga rayuwar al’ummarmu,” in ji gwamnan.
Ya tabbatar da cewa gwamnatin jihar za ta yi aiki kafaɗa da kafaɗa da hukumomin tarayya da abin ya shafa, domin tabbatar da gaskiya, aiwatar da aikin cikin lokaci da kuma samun cikakken amfani daga gare shi.
Yayin da yake nuna godiya ga Gwamnatin Tarayya kan amincewa da aikin jirgin ƙasan, Gwamna Yusuf ya jaddada ƙudurin gwamnatinsa na tallafa wa shirye-shiryen tarayya ta hanyar manufofi masu kyau da bunƙasa ababen more rayuwa.
