Kotun Tarayya da ke zamanta a Abuja ta bai wa tsohon shugaban kasa, Goodluck Jonathan damar tsayawa takarar shugaban kasa a zaben shekarar 2027.
Wata bangare ta jam’iyyar Peoples Democratic Party (PDP) karkashin jagorancin Kabiru Tanimu Turaki ta bai wa Jonathan takardar rangwame a makon da ya gabata domin ya zama dan takarar shugaban kasa daya tilo na jam’iyyar.
Sai dai wani mutum mai suna Johnmary Jideobi ya shigar da kara a kotu yana neman a hana Jonathan gabatar da kansa ga kowace jam’iyya a matsayin dan takarar shugaban kasa a zaben 2027.
Mai karar ya kuma bukaci kotun ta hana Independent National Electoral Commission (INEC) karbar suna, tantancewa ko wallafa sunan Jonathan a matsayin dan takarar shugaban kasa.
Ya roki kotun ta fayyace ko, bisa la’akari da sashe na 1(1), (2), (3) da 137(3) na kundin tsarin mulkin 1999, Jonathan na da damar sake neman kujerar shugaban kasa.
Sai dai a hukuncin da Mai Shari’a Peter Lifu ya yanke a ranar Talata, ya bayyana cewa Jonathan na da damar shiga takarar shugaban kasa.
Kotun ta kuma ci tarar Naira miliyan 20 a kan Jideobi domin a bai wa tsohon shugaban kasar.
Haka kuma, kotun ta ci tarar Naira miliyan daya a kan mai karar domin a bai wa Babban Lauyan Tarayya (AGF).
Mai Shari’a Lifu ya ce Jideobi ba shi da hurumin shigar da karar domin bai nuna wata asara da ya yi sakamakon zargin cewa Jonathan na son tsayawa takara ba.
Alkalin ya kara da cewa wata Babbar Kotun Tarayya da ke Yenagoa da kuma Kotun Daukaka Kara sun taba yanke hukuncin cewa Jonathan na da damar sake tsayawa takara, don haka dole ne ya bi hukuncin kotun daukaka karar.
Daga nan ne alkalin ya bayyana karar da cewa “cin zarafin tsarin shari’a ne.”
Hakazalika, Mai Shari’a Lifu ya yi watsi da bukatar da Jideobi ya gabatar na neman alkalin ya janye daga sauraron karar, yana mai cewa bukatar ba ta da tushe.
