Tsohon Sanata, Shehu Sani, ya lashe zaben fidda gwani na jam’iyyar All Progressives Congress (APC) domin takarar Sanatan Kaduna ta Tsakiya.
Shehu Sani ya doke tsohon Kakakin Majalisar Dokokin Jihar Kaduna, Yusuf Zailani, da kuma wani dan takara mai suna Shettima a zaben fidda gwani da aka gudanar ranar Litinin.
Da take sanar da sakamakon zaben, jami’ar zabe, Sameera Ibrahim, ta bayyana cewa Shehu Sani ya samu kuri’u 9,105, wanda ya ba shi nasarar lashe tikitin APC na Sanatan Kaduna ta Tsakiya.
Ta ce Yusuf Zailani ya samu kuri’u 1,021, yayin da Shettima ya samu kuri’u 1,253.
Sameera Ibrahim ta bayyana zaben a matsayin wanda aka gudanar cikin lumana da gaskiya, tare da yabawa wakilan jam’iyya da jami’an gudanarwa bisa yadda suka nuna da’a da bin ka’ida yayin gudanar da zaben.
Nasarar ta Shehu Sani na nuni da wata babbar dawowa siyasa gare shi, kasancewar ya taba wakiltar Kaduna ta Tsakiya a Majalisar Dokokin Tarayya, inda ya yi fice wajen fafutukar kare dimokuradiyya, shugabanci nagari da kuma adalci a zamantakewa.
Masu lura da al’amuran siyasa sun bayyana sakamakon a matsayin babban sauyi a cikin APC a Jihar Kaduna gabanin babban zaben kasa, musamman idan aka yi la’akari da manyan ‘yan takarar da suka fafata a zaben.
Magoya bayan tsohon sanatan sun yi murnar nasarar jim kadan bayan bayyana sakamakon, inda suka nuna kwarin gwiwar cewa yana da damar samun nasara a babban zaben da ke tafe.
