Yawan jigilar kaya a tashoshin jiragen ruwa na Legas ya ƙaru matuƙa, inda Hukumar Tashoshin Jiragen Ruwa ta Najeriya (Nigerian Ports Authority – NPA) ta bayyana cewa ana sa ran jiragen ruwa 18 za su sauka a tashoshin Apapa da Tin Can Island a wannan makon, dauke da kwantena, kaya masu yawa (bulk), kayayyakin man fetur da kuma kaya na gama-gari.
A cewar rahoton Shipping Position na NPA, ana sa ran jiragen za su kawo kwantena 6,985 (FCL) da kuma kaya nauyin tan 284,585 na metrik, wanda ke nuna ƙaruwa da kashi 89.7 cikin ɗari idan aka kwatanta da tan 152,017 na metrik da aka samu a makon da ya gabata.
Tashar APMT ce za ta karɓi mafi yawan kaya, inda jiragen kwantena huɗu za su kawo FCL 3,554, sai Tin Can Island Container Terminal (TICT) da jirage biyu masu kawo FCL 800.
Manyan kamfanonin jigilar kaya na duniya kamar Maersk, COSCO, MSC, Hapag-Lloyd da Ocean Network Express ne za su kula da sauran ayyukan.
Daga cikin jiragen da ake sa ran zuwansu akwai MSC GEORGIA II mai ɗauke da FCL 300, jirgin dakon man fetur HUDSON da tan 30,000 na AGO, da kuma MAERSK CAPE COAST mai ɗauke da FCL 1,171.
Haka kuma, ana sa ran jiragen dakon kaya masu yawa kamar ELLIREA da DESERT LION, wadanda za su kawo alkama da sauran kayayyaki.
Jadawalin zuwan jiragen zai ci gaba har tsakiyar watan Fabrairu, inda jirage irin su UNITY EXPLORER za su kawo tan 55,000 na sukari, yayin da MANDARIN zai kawo tan 9,000 na malt.
Jirgin ƙarshe, DESERT OASIS, ana sa ran zai iso a ranar 16 ga Fabrairu dauke da sama da tan 54,000 na alkama.
A makon da ya gabata, jiragen ruwa 20 sun sauka a tashoshin Legas, suna kawo kwantena sama da 10,000, kaya tan 152,000 na metrik, da kuma motoci tsofaffi 1,150 — adadi mai yawa idan aka kwatanta da makon da ya gabata kafin hakan.
Masana a fannin harkokin tashoshin ruwa sun ce wannan ƙaruwa a yawan kaya na nuna ƙara amincewa da tattalin arzikin Najeriya, inda nau’o’in kayayyakin da ake shigowa da su ke nuna ƙarfinsu na tashoshin wajen ɗaukar buƙatun kasuwanci iri-iri.
Masu ruwa da tsaki sun yi imanin cewa wannan yanayi alama ce ta farfaɗowar tattalin arziki, inda ake sa ran ƙarin shigowar kaya zai taimaka wajen daidaita sarkar samar da kayayyaki, bunƙasa masana’antu, da kuma ƙarfafa gasa ta kasuwancin Najeriya a duniya.
