Hukumar Ƙididdiga ta Ƙasa (NBS) ta bayyana cewa ribar da Najeriya ta samu daga cinikayyar kayayyaki da ƙasashen waje ta kai Naira tiriliyan 7.55 a rubu’in farko na shekarar 2026, wanda ya nuna ƙarin kashi 340.9 cikin ɗari idan aka kwatanta da rubu’in da ya gabata.
Rahoton ya nuna cewa jimillar cinikayyar ƙasar ta kai Naira tiriliyan 34.79, inda fitar da kayayyaki zuwa ƙasashen waje ya kai Naira tiriliyan 21.17, yayin da shigo da kayayyaki ya tsaya a Naira tiriliyan 13.62.
NBS ta danganta wannan gagarumin ci gaba da ƙarin kuɗaɗen da aka samu daga fitar da ɗanyen mai da kuma raguwar shigo da kayayyakin man fetur daga ƙasashen waje.
Fitar da kayayyaki ya ƙaru da kashi 2.77 cikin ɗari idan aka kwatanta da makamancin lokacin bara, sannan ya ƙaru da kashi 11.63 cikin ɗari idan aka kwatanta da rubu’in da ya gabata. Hakan ya sa fitar da kayayyaki ya wakilci kashi 60.85 cikin ɗari na dukkan cinikayyar ƙasar.
Ɗanyen mai ya samar da Naira tiriliyan 11.20, wanda ya kai kashi 52.9 cikin ɗari na dukkan kayayyakin da aka fitar, yayin da kayayyakin da ba na mai ba suka samar da Naira tiriliyan 3.19, daidai da kashi 15.05 cikin ɗari.
Ƙasar Indiya ce ta kasance babbar kasuwar kayayyakin Najeriya da darajar Naira tiriliyan 2.77, sai Faransa da Naira tiriliyan 1.97, Netherlands da Naira tiriliyan 1.95, Spain da Naira tiriliyan 1.63, da kuma Amurka da Naira tiriliyan 1.18. Waɗannan ƙasashe biyar sun karɓi kusan kashi 44.8 cikin ɗari na dukkan kayayyakin da Najeriya ta fitar.
A ɓangaren shigo da kayayyaki kuwa, an samu raguwar kashi 18.2 cikin ɗari idan aka kwatanta da bara, da kuma kashi 21.1 cikin ɗari idan aka kwatanta da rubu’in da ya gabata, inda jimillar shigo da kayayyaki ta tsaya a Naira tiriliyan 13.62.
Manyan kayayyakin da aka fi shigowa da su sun haɗa da injuna da kayan sufuri da darajar Naira tiriliyan 5.01, makamashi da man fetur da Naira tiriliyan 2.65, da sinadarai da Naira tiriliyan 2.02.
Ƙasar Sin ta ci gaba da kasancewa babbar ƙasar da Najeriya ke shigo da kayayyaki daga gare ta, inda darajar kayayyakin da aka shigo da su daga can ta kai Naira tiriliyan 5.10, wato kashi 37.4 cikin ɗari na dukkan shigo da kayayyaki.
Rahoton ya kuma nuna cewa fitar da kayayyakin noma ya ragu da kashi 31.2 cikin ɗari zuwa Naira tiriliyan 1.17. Sai dai fitar da albarkatun ƙasa ya ƙaru da kashi 46.8 cikin ɗari zuwa Naira tiriliyan 1.53, yayin da fitar da ma’adinai masu ƙarfi ya tashi da kashi 74.6 cikin ɗari zuwa Naira biliyan 102.8.
Kokon gyada (Cocoa beans) ya ci gaba da kasancewa kayayyakin noma mafi daraja da Najeriya ta fitar, inda ya samar da Naira biliyan 596.9.
Najeriya ta kuma ci gaba da samun riba mai yawa a cinikayya da ƙasashen Afirka, inda ta fitar da kayayyaki na Naira tiriliyan 4.06 yayin da kayayyakin da ta shigo da su daga nahiyar suka kai Naira biliyan 654.9 kacal.
A cikin ƙasashen ECOWAS kuwa, Najeriya ta fitar da kayayyaki na Naira tiriliyan 2.20, yayin da ta shigo da kayayyaki na Naira biliyan 65.9, inda kayayyakin man fetur suka fi rinjaye.
Rahoton ya ƙara da cewa jigilar kayayyaki ta ruwa ce ta mamaye harkokin kasuwancin ƙasar, inda ta wakilci sama da kashi 99 cikin ɗari na kayayyakin da aka fitar da kuma kashi 93 cikin ɗari na kayayyakin da aka shigo da su.
Tashar Jiragen Ruwa ta Apapa ce ta fi kowace muhimmanci, inda ta sarrafa kayayyakin da aka fitar da darajarsu ta kai Naira tiriliyan 15.48 da kuma kayayyakin da aka shigo da su na Naira tiriliyan 4.92, wanda ke nuna muhimmiyar rawar da tashar ke takawa a harkokin kasuwancin Najeriya.
