African Development Bank (AfDB) ta amince da wani kunshin tallafin kuɗi na dala miliyan 61 ga Development Bank of Nigeria (DBN) domin faɗaɗa damar samun rance ga kasuwancin mata, musamman a fannin noma.
Kunshin tallafin, wanda aka amince da shi a ranar 29 ga Afrilu, ya ƙunshi dala miliyan 50 na rancen da aka ware musamman domin mata, dala miliyan 8 na tallafi mai rangwame ƙarƙashin tsarin ba da kuɗi ga ƙananan kamfanonin abinci da noma, da kuma tallafin dala miliyan 3 ƙarƙashin shirin AFAWA, wanda Women Entrepreneurs Finance Initiative (We-Fi) ke tallafawa.
AfDB ta bayyana cewa sama da kashi 95 cikin 100 na kuɗaɗen an ware su ne domin ƙananan da matsakaitan kamfanonin da mata ke jagoranta, a wani yunƙuri na rage gibin samun kuɗaɗe tsakanin maza da mata a Afirka tare da bunƙasa tattalin arziki mai anfani ga kowa.
Babban Daraktan Ofishin AfDB a Najeriya, Abdul Kamara, ya bayyana mata ‘yan kasuwa a matsayin “ɗaya daga cikin manyan ginshiƙan tattalin arzikin Najeriya da har yanzu ba a ba su cikakken dama ba.”
Ya ce, “Ta hanyar aiki da DBN wajen tallafa wa kasuwancin mata a fannonin noma, makamashi mai tsafta, lafiya da sauran fannoni, bankin na zuba jari ne a cikin injin sauya tattalin arzikin Najeriya cikin adalci.”
Shirin zai haɗa da samar da rance na dogon lokaci, tallafi mai rangwame, garanti na bashi, da kuma horaswa domin inganta ba da kuɗi ga ƙananan da matsakaitan sana’o’i a Najeriya.
Haka kuma, tsarin bayar da ƙarin lada bisa kyakkyawan aiki ƙarƙashin AFAWA ana sa ran zai ƙara yawan rancen da ake bai wa mata a cikin tsarin DBN tare da ƙara yawan kamfanonin mata da za su ci gajiyar shirin.
AfDB ta ce wannan tallafi ya yi daidai da tsare-tsarenta na shekaru goma daga 2024 zuwa 2033, da kuma takardar dabarun Najeriya ta 2025 zuwa 2030, musamman wajen bunƙasa tattalin arziki mai anfani ga kowa, ci gaban kamfanoni masu zaman kansu da daidaito tsakanin jinsi.
Amincewar da aka bayar ta kuma ƙara ƙarfafa haɗin gwiwa tsakanin AfDB da DBN tun daga lokacin kafa bankin, tare da ƙarfafa tallafi a fannoni kamar shugabanci, zuba jari da samar da kuɗaɗen dogon lokaci.
