Hukumar Kula da Harkokin Man Fetur ta Ƙasa, Nigerian Upstream Petroleum Regulatory Commission (NUPRC), ta bayyana cewa matatun mai na cikin gida a Najeriya sun karɓi ganga miliyan 28.5 kacal na danyen mai a rubu’in farko (Q1) na shekarar 2026, ƙasa sosai da ganga miliyan 61.9 da aka ware musu.
A cewar hukumar, kamfanonin samar da mai sun ma bayar da ganga miliyan 68.7, amma ainihin isar da man ya gaza saboda saɓanin farashi tsakanin masu hakar mai da masu tace shi, a ƙarƙashin tsarin “mai saye mai yarda, mai sayarwa mai yarda”.
Hukumar ta ce:
“Jimillar danyen man da aka kai wa matatun cikin gida ya kai ganga miliyan 28.5, wanda ke nufin an samu kashi 36 zuwa 46 cikin 100 na abin da aka tsara zuwa ƙarshen rubu’in farko.”
Bayanan kowane wata sun nuna ci gaba da gibin samarwa:
- A watan Janairu, an kai ganga miliyan 9.2 ne kacal daga cikin miliyan 22.6 da aka ware.
- A Fabrairu kuwa, an kai ganga miliyan 9.1 daga miliyan 20.5.
- A watan Maris an samu ɗan ƙarin ci gaba da ganga miliyan 10.1 daga miliyan 18.8.
Domin rubu’i na biyu (Q2), NUPRC ta ware ganga miliyan 55.1, yayin da masu samar da mai suka yi alƙawarin samar da ganga miliyan 58.8, amma har yanzu akwai barazanar rashin cika wannan buri idan sabanin farashi ya ci gaba.
Wannan ƙaranci na zuwa ne a daidai lokacin da yawan man da Najeriya ke samarwa ke sauyawa. Bayanai daga Organization of the Petroleum Exporting Countries sun nuna cewa Najeriya ta samar da ganga miliyan 1.459 a rana a Janairu, ta ragu zuwa miliyan 1.31 a Fabrairu, sannan ta ɗan farfaɗo zuwa miliyan 1.38 a Maris.
Rahotanni na baya sun nuna cewa Najeriya ta kasa cimma burin gwamnati na ganga miliyan 1.84 a rana, inda aka samar da kusan ganga miliyan 92 a watanni biyu na farko na 2026, maimakon ganga miliyan 108.6 da aka tsara — gibin ganga miliyan 16.6.
Masana sun yi gargadin cewa matuƙar ba a warware matsalar farashi ba, shirin samar da danyen mai ga matatun cikin gida ƙarƙashin dokar Petroleum Industry Act zai ci gaba da fuskantar matsala, lamarin da zai iya dakile ƙoƙarin rage dogaro da shigo da man fetur daga ƙasashen waje.
