An bayyana sunan mutumin da ake zargi da bude wuta a wajen taron White House Correspondents’ Association Dinner a matsayin Cole Tomas Allen, malami mai shekaru 31 kuma mai kirkirar wasannin bidiyo daga kudancin California, a cewar CNN.
Jami’an tsaro sun ce Allen, wanda ke zaune a Torrance, wani yanki na Los Angeles, shi ne mutumin da aka cafke dauke da makami kusa da wurin taron inda Donald Trump da manyan jami’ai suka halarta.
Bayanan jama’a sun nuna cewa Allen ya taba aiki a matsayin malami na wucin gadi a kamfanin koyarwa na C2 Education, inda aka taba karrama shi a matsayin “malamin wata” a watan Disambar 2024.
A shafinsa na LinkedIn, an nuna cewa ya kammala digiri na farko a fannin injiniyan inji daga California Institute of Technology a 2017, sannan ya samu digiri na biyu a fannin kimiyyar kwamfuta daga California State University, Dominguez Hills.
Yayin da yake dalibi, an taba bayyana shi a wani rahoton labarai na 2017 saboda kirkirar na’urar dakatar da keken guragu idan gaggawa ta taso.
Allen ya kuma bayyana kansa a matsayin mai kirkirar wasannin bidiyo, inda ake zargin ya wallafa wani wasan kansa mai suna “Bohrdom” a dandalin Steam. Bayanai sun nuna ya yi rajistar alamar kasuwanci ta wasan a 2018, kuma yana aiki kan wani sabon wasa mai suna na wucin gadi “First Law”.
Bayanan Hukumar Zaben Tarayya (FEC) sun nuna cewa Allen ya bayar da gudunmawar dala 25 ga kamfen din mataimakiyar shugaban kasa Kamala Harris a watan Oktoban 2024.
Hukumomi sun ce wanda ake zargin yana dauke da makamai da dama, kuma an kama shi ne bayan ya tsallake wani shingen tsaro a wajen taron da aka gudanar a otal din Washington Hilton.
Lamarin ya janyo firgici a wajen taron, inda aka kwashe Donald Trump, uwargidansa, da sauran manyan baki zuwa wurin tsaro.
Wani jami’in United States Secret Service ya samu rauni sakamakon harbi, amma ya tsira bayan harsashin ya bugi rigar kariya.
Ana ci gaba da bincike kan lamarin, kuma har yanzu hukumomi ba su gano dalilin harin ba.
