Babban Bankin Najeriya (CBN) ya ɗauki sabbin matakai domin ƙarfafa sa ido kan kuɗaɗen da ’yan Najeriya mazauna ƙasashen waje ke aikowa, inda ya umurci dukkan kamfanonin tura kuɗi na ƙasashen waje (IMTOs) da su rika sarrafa mu’amaloli ta asusun naira na musamman a bankunan cikin gida, domin ƙara gaskiya da kuma inganta wadatar kuɗaɗen musayar waje a kasuwar hukuma.
Daraktan Sashen Ciniki da Musayar Kuɗi na CBN, Musa Nakorji, ne ya sanya hannu kan sanarwar da aka aikewa IMTOs, bankunan da aka amince da su, da kuma jama’a baki ɗaya, mai taken “Matakan Ƙara Inganta Bin Ka’idoji a Fannin Tura Kuɗi”.
Sanarwar ta umarci IMTOs da su tabbatar da cewa dukkan mu’amalolin tura kuɗi, ciki har da biyan masu karɓa da sauran sulhu, ana gudanar da su ne kawai ta asusun da aka buɗe a bankunan da aka amince da su a cikin ƙasar.
Wannan mataki na nuna wani gagarumin sauyi a yadda ake tsara harkar tura kuɗi, inda zai rufe gibin da ke ba da damar wucewar kuɗi ta hanyoyin da ba su da sauƙin bin diddigi, tare da ƙarfafa ƙoƙarin bankin wajen shigar da kuɗaɗen waje cikin kasuwar hukuma.
Sassaucin Gudanar da Asusun IMTOs
A karkashin sabbin dokokin, IMTOs za su iya zaɓar asusun da suke da shi ko kuma buɗe sabbin asusun naira na musamman. Haka kuma suna da damar amfani da asusu da dama a bankuna daban-daban bisa ga tsarin kasuwancinsu.
Dukkan kuɗaɗen da aka turo daga ƙasashen waje da kuma kuɗaɗen da aka samu daga canjin kuɗaɗen waje dole ne a saka su kai tsaye cikin waɗannan asusun. CBN ta ce wannan zai taimaka wajen ƙarfafa gaskiya, sauƙaƙa bin diddigi da kuma sa ido kan kuɗaɗen diaspora, waɗanda ke da matuƙar muhimmanci ga tattalin arzikin Najeriya.
Farashi na Gaskiya ta Bloomberg BMatch
A wani mataki na ƙara inganta daidaiton farashi, CBN ta umurci IMTOs da su rika amfani da farashin kasuwa kai tsaye daga Bloomberg BMatch wajen ƙayyade farashin mu’amaloli. Ana sa ran wannan zai taimaka wajen gano ainihin farashi, rage gibin bayanai tsakanin bankuna da kamfanonin tura kuɗi, da kuma ƙarfafa shiga kasuwar hukuma.
Haka kuma, bankunan da aka amince da su an ba su damar sarrafa canjin kuɗin waje daga asusun IMTOs zuwa sauran bankuna da mahalarta kasuwa da aka amince da su, ciki har da masu canjin kuɗi (BDC), wanda ake ganin zai ƙara wadatar kuɗi a tsarin.
Dakile Zubewar Kuɗi zuwa Kasuwar Bogi
Ta hanyar tabbatar da cewa dukkan kuɗaɗen diaspora sun shiga cikin tsarin banki, CBN na ƙoƙarin ƙara wadatar kuɗaɗen waje, dakile zubewar su zuwa kasuwar canji ta bayan fage (parallel market), da kuma inganta yadda kasuwar ke aiki gaba ɗaya.
Sanarwar ta kuma jaddada wajibcin bin ƙa’idoji, inda ta umarci IMTOs da su adana cikakkun bayanan mu’amaloli domin dubawar hukumomi, tare da bin dokokin hana safarar kuɗin haram, yaƙi da tallafa wa ta’addanci, da kuma hana yaduwar makaman kare dangi.
Lokacin Daidaitawa Kafin Aiwatarwa
Za a fara aiwatar da wannan doka daga ranar 1 ga Mayu, 2026, domin bai wa kamfanonin damar daidaita tsarin aikinsu da sabbin ƙa’idojin.
Tun a ranar 31 ga Janairu, 2024, CBN ta fitar da sabbin ƙa’idoji kan ayyukan tura kuɗi na ƙasashen waje a Najeriya, inda ta tsara yadda ake ba da lasisi da gudanar da ayyukan IMTOs.
Wannan sabon mataki na nuna yadda Babban Bankin ke ƙara amfani da matakan tsari domin daidaita kasuwar canjin kuɗi, yayin da ake ƙoƙarin tabbatar da wadatar kuɗi, dawo da amincewar masu zuba jari, da kuma tabbatar da ingantaccen aiki a kasuwar.
