Gwamnatin Tarayya tare da World Bank na shirin haɗa ‘yan Najeriya miliyan 5.2 da wutar lantarki zuwa watan Yunin 2026, a ƙarƙashin wani shiri na dala miliyan 750 da ke mayar da hankali kan faɗaɗa makamashi mai sabuntawa.
A cewar sabon rahoton ci gaba da sakamako na Bankin Duniya, shirin Nigeria Distributed Access through Renewable Energy Scale-up Project (DARES) na tafiya yadda ya kamata, inda aka fitar da kashi 9% na kuɗin, tare da ware dala miliyan 422.2 domin aiwatarwa.
Rahoton ya nuna cewa tuni an samar da wutar lantarki ga sama da mutane miliyan 3.6, fiye da yadda aka tsara a farko.
“Shirin na kan hanya don haɗa mutane miliyan 5.2 da wutar lantarki zuwa watan Yunin 2026,” in ji rahoton.
An amince da shirin a watan Disamba na 2023, kuma an tsara shi domin faɗaɗa samun wuta ga gidaje da ƙananan da matsakaitan ‘yan kasuwa (MSMEs), ta hanyar tsarin makamashi mai sabuntawa da kamfanoni masu zaman kansu ke jagoranta.
Muhimman abubuwan da shirin ya ƙunsa sun haɗa da ƙananan tashoshin wutar lantarki na hasken rana masu haɗa tsarin hybrid (mini-grids), na’urorin hasken rana na gida da na kasuwanci, da kuma tallafin fasaha domin ƙarfafa aiwatarwa.
Ƙarfin samar da makamashi mai sabuntawa ya kai megawatt 38.76 a yanzu, tare da burin kaiwa megawatt 465 zuwa shekarar 2028.
Dubban gidaje da ‘yan kasuwa sun riga sun amfana da wutar lantarki ta hanyar hasken rana, yayin da ake ci gaba da ƙoƙarin jawo jarin masu zaman kansu da inganta dokoki.
Duk da haka, Bankin Duniya ya bayyana haɗarin shirin a matsayin “mai yawa,” yana danganta hakan da matsalolin tattalin arziki, shugabanci da tsarin hukumomi.
Ana sa ran shirin zai ci gaba har zuwa Disamba 2028, tare da burin amfanar da mutane miliyan 16.
Har ila yau, Najeriya na ci gaba da dogaro da rance mai sauƙin sharadi, inda zuwa watan Satumban 2025 take bin World Bank Group bashin dala biliyan 19.54, wanda ya kai kusan kashi 40% na bashin ƙasashen waje na dala biliyan 48.46—abin da ke nuna muhimmiyar rawar da bankin ke takawa wajen tallafa wa ayyukan more rayuwa.
