Hukumar Kula da Harkokin Kamfanoni ta Ƙasa (Corporate Affairs Commission – CAC) ta bayyana cewa yanzu tana sarrafa kusan buƙatun rijistar kasuwanci 10,000 a kowace rana, biyo bayan kaddamar da fasahar basirar wucin-gadi (AI) a kan dukkanin dandamalinta.
Babban Darakta (Registrar-General) na CAC, Hussaini Magaji, ne ya bayyana hakan a Abuja yayin laccar bikin cika shekaru 35 da kafuwar hukumar, inda ya ce haɗa AI ya sauya yadda CAC ke tafiyar da yawan rijistoci da kuma amsa tambayoyin masu amfani da ayyukanta a faɗin ƙasar.
“Yau, Hukumar Kula da Harkokin Kamfanoni tana karɓar kusan buƙatun rijistar kasuwanci 10,000 a kullum, idan aka kwatanta da ɗaruruwa kaɗan a baya,” in ji Magaji.
Ya ƙara da cewa tsarin CAC yanzu yana sarrafa matsakaicin tambayoyin kwastomomi 5,000 a kullum ta hanyar imel da cibiyoyin kiran waya.
Magaji ya danganta ƙarin yawan rijistocin da sauye-sauyen haraji na baya-bayan nan, manufofin gwamnati na ƙarfafa shigar da kasuwancin da ke aiki ba tare da rijista ba cikin tsari na hukuma, da kuma saurin bunƙasar kasuwancin dijital da na kafafen sada zumunta.
Ya bayyana cewa CAC ta sauya daga ofishin hannu guda ɗaya a shekarar 1991 zuwa cikakkiyar rijistar kamfanoni ta zamani (digital), wadda ke ba da ayyuka daga farko zuwa ƙarshe ga duniya baki ɗaya, awanni 24 a rana.
An kaddamar da tashar AI a shekarar 2025, wadda ta fuskanci ƙalubale a farko, amma yanzu tana samar da sakamako mai kyau, in ji shi.
‘Yan majalisa da hukumomin da ke da alhaki sun yi alkawarin goyon bayan sauye-sauyen. Shugaban Kwamitin Majalisar Wakilai kan Harkokin Kasuwanci, Ahmed Munir, ya ce majalisa za ta ba da cikakken goyon bayan dokoki domin ƙarfafa gine-ginen dijital. Haka kuma, Darakta Janar na Hukumar Kula da Fasahar Sadarwa ta Ƙasa (NITDA), Kashifu Abdullahi, ya ce: “Muna cikin zamanin basirar wucin-gadi, kuma hanya ɗaya tilo ta sauya cibiyoyi a yau ita ce rungumar AI da haɗa ta cikin ayyuka.”
Hukumar CAC ta kuma haɗa gwiwa da kamfanin Google domin ƙarfafa tsarin fasaharta, inganta aikin tashar yanar gizo, da hanzarta lokacin kammala ayyuka.
Sabbin kayan aikin da ke amfani da AI sun haɗa da mataimakin shari’a na lantarki don amsa tambayoyin doka da ƙa’idoji, da kuma na’urar ƙirƙirar sunan kasuwanci domin sauƙaƙa ajiyar suna.
