Bashin waje na jihohi da Babban Birnin Tarayya (FCT) ya ƙaru sosai a shekarar 2025, inda jihohi 32 tare da FCT suka tara kusan dala biliyan 5.7, duk da ƙarin kuɗaɗen da suke samu daga Asusun Raba Kuɗaɗen Tarayya (FAAC).
Bayanai daga Hukumar Kula da Bashin Ƙasa (DMO) sun nuna cewa jimillar bashin jihohi da FCT ta tashi daga dala biliyan 4.80 a shekarar 2024 zuwa dala biliyan 5.68 a 2025, wato ƙarin dala miliyan 884.66 (kashi 18.43 cikin 100).
Daga cikin ƙungiyoyi 37 (jihohi 36 da FCT), guda 33 sun ƙara bashin waje, yayin da guda huɗu kacal—Edo, Rivers, Anambra da Bayelsa—suka samu raguwa.
Jihar Edo ce ta fi rage bashin, inda ta sauke dala miliyan 29.02 (kashi 7.58), sai Rivers da ta rage dala miliyan 28.69 (kashi 14.37).
A gefe guda, wasu jihohi sun ƙara aro sosai. Bashin Katsina ya kusan ninka zuwa dala miliyan 200.62, yayin da Kogi (kashi 126), Niger (kashi 109), Plateau (kashi 187) da Gombe (kashi 169) suka samu mafi girman ƙaruwa bisa kaso.
Jihar Lagos, wacce ita ce mafi yawan bashin waje, ta samu ƙaramin ƙaruwa na dala miliyan 4.83 kacal (kashi 0.41), alamar cewa ta ɗauki matakin taka-tsantsan duk da cewa bashinta ya haura dala biliyan 1.17.
Wannan ƙaruwa na bashin na zuwa ne duk da cewa kuɗaɗen FAAC sun ƙaru sosai. Jihohi sun karɓi Naira tiriliyan 7.315 a 2025, ƙarin kashi 41 cikin 100 idan aka kwatanta da 2024, kuma idan aka haɗa da kuɗaɗen rabon mai (derivation), jimillar kuɗin da suka samu ya kai Naira tiriliyan 8.934. Duk da haka, jihohin sun biya Naira biliyan 455.38 wajen biyan bashin waje, ƙarin kashi 25.77 daga shekarar 2024.
Masana sun yi gargaɗi cewa dogaro da bashin dala na ƙasashen waje na jefa jihohi cikin haɗarin canjin kuɗi, domin duk lokacin da darajar naira ta faɗi, farashin biyan bashin zai ƙaru.
Wani masani, Farfesa Taiwo Owoeye, ya ce: “Ta hanyar ɗaukar ƙarin bashin waje, jihohi da dama na iya jingina makomarsu ta kuɗaɗe ga rabon tarayya na gaba.”
Sauran masana kamar Teslim Shitta-Bey da Dayo Adenubi sun jaddada cewa dole jihohi su ƙara ƙoƙarin samun kuɗaɗe daga cikin gida, rage ɓarnar kashe kuɗi, da kuma ɗaukar hanyoyin samun jari masu ɗorewa, maimakon ci gaba da dogaro da bashin waje duk da karuwar kuɗaɗen FAAC.
