Ajiyar kuɗaɗen waje na Najeriya ya haura dala biliyan 47, wanda shi ne mafi girma tun shekarar 2018, alamar ƙarfafa matsayar kuɗin waje ta ƙasar tare da ƙara amincewa da hangen nesa na Babban Bankin Najeriya (CBN).
Sabbin bayanai sun nuna cewa ajiyar ya kai dala biliyan 47.025, inda ya zarce rekodin da aka samu a watan Agustan 2018 na dala biliyan 47.01. Wannan hauhawa ya fara ne a ƙarshen 2025 kuma ya ci gaba zuwa farkon 2026.
A ƙarshen shekarar 2025, ajiyar kuɗaɗen waje ya tsaya a dala biliyan 45.5, daga dala biliyan 40.8 a farkon shekarar, wanda ke nuna ƙarin dala biliyan 4.7 cikin shekara guda. A watan Janairun 2026 kaɗai, ajiyar ya ƙaru da fiye da dala miliyan 700, inda ya haura dala biliyan 46 karo na farko cikin shekaru takwas.
Masana sun danganta wannan ci gaba da ƙaruwa a samar da ɗanyen mai, ƙarfin kuɗaɗen fitar da kaya, ingantattun gyare-gyaren kasuwar canjin kuɗi (FX), da kuma sake dawowar amincewar masu zuba jari. Haka kuma, shigar kuɗaɗe daga ƙungiyoyin ƙasa da ƙasa da na ƙasashe biyu, tare da ƙarfafa kuɗaɗen da ’yan ƙasa ke turo wa daga waje (remittances), sun taimaka wajen tara ajiyar.
CBN ta bayyana tara ajiyar a matsayin wani ɓangare na dabararta ta daidaita tattalin arziƙi. Bankin na da burin kai dala biliyan 51 a ajiyar waje kafin ƙarshen 2026, buri da yanzu ake ganin mai yiwuwa ne idan aka ci gaba da wannan tafiya.
“Ci gaban da ake samu tun Disambar 2025 na nuna cewa ana sake gina garkuwar kuɗaɗen waje na Najeriya a hankali amma a kai a kai,” in ji wani masani, yana mai ƙara da cewa ƙarfafa ajiyar na ƙara wa CBN ikon sarrafa sauye-sauyen farashin canjin kuɗi.
Wannan mataki na ajiyar ya zo ne a lokacin da CBN ta sake shigar da ’yan Bureau de Change (BDC) cikin kasuwar canjin kuɗi ta hukuma, tare da iyaka kan rabon kuɗi na mako-mako, a matsayin wani ɓangare na gyare-gyaren da ke nufin ƙara ruwa (liquidity) da gaskiya a kasuwar.
