Kamfanonin samar da wutar lantarki a Nijeriya (GenCos) sun bukaci Gwamnatin Tarayya da ta tsawaita shirin tallafin wutar lantarki na Naira tiriliyan 3.6 (₦3.6trn) bayan shekarar 2028, suna mai gargadin cewa matsalar ƙarancin kuɗi da ke addabar sashen ba za a iya warware ta cikin shekaru uku kacal ba.
Shugabar ƙungiyar Kamfanonin Samar da Wutar Lantarki (Association of Power Generation Companies – APGC), Joy Ogaji, ce ta bayyana hakan a matsayin martani ga takardun gwamnati da suka nuna shirin ware tallafin Naira tiriliyan 1.2 (₦1.2trn) a kowace shekara daga 2026 zuwa 2028.
Ogaji ta yaba da shirin, tana mai cewa yana nuna hangen nesa, amma ta yi tambaya kan dorewarsa.
“Ba zai yiwu a tsawaita lokacin bayan 2028 ba ne? Shin muna sa ran wani mu’ujiza bayan 2028? Shin muna da wani sihiri da za mu yi amfani da shi wajen kawar da ainihin matsalar ƙarancin kuɗi?” in ji ta.
Ta yi gargaɗin cewa duk da cewa tallafi na iya ba da sauƙi na ɗan lokaci, ba ya magance manyan matsalolin tsarin sashen, kamar rashin tsayayyen tsarin kuɗi da raunin ɗaukar alhaki.
“Wannan zai zama kamar zuba kuɗi ne a kwando mai zubewa, ba tare da samar da ladabi da ɗaukar alhakin da ake buƙata don dakatar da yaduwar matsalar ba,” in ji ta.
Ogaji ta jaddada buƙatar ɗaukar matakin biyan bashin baya (retroactive action) domin warware tarin basussukan da ake bin kamfanonin samar da wutar lantarki, tana mai cewa tsofaffin basussuka na ci gaba da takura ayyukansu.
Ya zuwa Disamba 2025, bashin da Gwamnati ke bin GenCos ya kai Naira tiriliyan 6.4 (₦6.4trn), duk da fitar da bondon Naira biliyan 501 (₦501bn) domin biyan wani ɓangare na bashin Naira tiriliyan 4 (₦4trn).
“Raunin da ke sashen wutar lantarki ya wuce a rufe shi da filasta ko bandeji. Akwai magani—sabon mayar da hankali kan sashen tare da ƙarfi da azamar siyasa,” in ji Ogaji, tana kira da a aiwatar da sauye-sauye na gaba ɗaya maimakon gyare-gyaren gaggawa na ɗan lokaci.
Duk da damuwarta, ta bayyana kwarin gwiwa ga ikon gwamnati na warware matsalar, tare da tabbatar da cewa GenCos a shirye suke su yi aiki tare da dukkan masu ruwa da tsaki.
“Muna da yakinin cewa Gwamnatin Tarayya tana da duk abin da ake buƙata don gyara sashen, kuma muna shirye kuma a buɗe muke don yin aiki tare domin samun nasara mai ɗorewa,” in ji ta.
